தமிழகத்தில் சித்த மருத்துவ பல்கலை கழகம் உருவாக ஆளுநர் ரவி முட்டுக்கட்டை

இந்திய மருத்துவத்தை பொறுத்தவரை தமிழகத்தின் செயல்பாடு என்பது கடந்த காலங்களில் மிகச் சிறப்பாக நிரூபணமாகியிருந்தது. அண்மையில் இந்த துறையின் சார்பில் 11 அழகு சாதனப் பொருட்கள் அறிமுகப்படுத்தப்படும் என்று அறிவிக்கப்பட்டு 6 பொருட்கள் அறிமுகப்படுத்தப்பட்டிருக்கிறது.

கொரோனா கேர் சென்டர்

ஏற்கெனவே கொரோனா பேரிடர் காலத்தில் சித்த மருத்துவத்தின் சார்பில் கொரோனா கேர் சென்டர் உருவாக்கி 1000-க்கும் மேற்பட்டோர் பயன்பெற்றிருக்கிறார்கள். அந்த வகையில் வாணியம்பாடியில் நிறுவப்பட்ட யுனானி கொரோனா கேர் சென்டர் மிகப்பெரிய அளவில் அந்த பகுதியில் வசிக்கும் இஸ்லாமிய தாய்மார்களுக்கு பெரிய அளவில் உதவியாக இருந்தது.

முதல்வர், சித்த மருத்துவத்திற்கு தனிப் பல்கலைக்கழகம் இந்தியாவிலேயே முதன் முறையாக தொடங்குவதற்கு சட்டமன்றத்தில் மசோதா நிறைவேற்றி ஆளுநருக்கு அனுப்பி வைத்தார்கள். ஒப்புதல் விரைவில் கிடைத்துவிடும் என்கின்ற நம்பிக்கையில் அண்ணா நகரில் அதற்கான அலுவலகம் ஒன்று தயார் செய்யப்பட்டது. அந்த அலுவலகத்தின் பணியினை நானும் துறையின் இயக்குநரும் நேரடியாக ஆய்வு செய்திருந்தோம்.

சித்த மருத்துவ பல்கலைக் கழகம் கட்டும் பணி

இந்த நிலையில், மாதவரம் பால்பண்ணையில் 25 ஏக்கர் நிலம் அந்த துறையிடம் இருந்து நில மாற்றம் செய்து சித்த மருத்துவ பல்கலைக் கழகம் கட்டுவதற்கான எற்பாடுகளை செய்திருக்கின்றோம். அதற்கான நிதி ஆதாரம் தமிழ்நாடு டாக்டர்.எம்.ஜி.ஆர். மருத்துவ பல்கலைக் கழகத்தின் வசம் இருக்கிறது. இந்த சித்த மருத்துவ பல்கலைக் கழகம் கட்டும் பணி தொடங்க அரசு தயாராக உள்ளது.

தேசிய தேர்வு முறை

இருந்தாலும் ஆளுநர் அந்த மசோதாவை திருப்பி அனுப்பி சில ஐயங்களை கேட்டிருந்தார். குறிப்பாக, சித்த மருத்துவ பல்கலைக் கழகத்தில் மாணவர்களின் சேர்க்கை நீட் தேர்வின் அடிப்படையில் நடக்குமா என்றெல்லாம் கேட்டு தேசிய தேர்வு முறைகளை இந்த சித்த மருத்துவப் பல்கலைக் கழகம் ஏற்று அதன்படி நடக்குமா என்றெல்லாம் கேட்டு இருந்தார்கள்.

சட்ட வல்லுநர்கள்

நம்முடைய சட்ட வல்லுநர்கள் இப்போது நடைமுறையில் என்ன இருக்கிறதோ அதைத்தான், இந்த மருத்துவக் கல்லூரிகளில் என்ன மாதியான நடைமுறைகள் இருக்கிறதோ அதைத் தான் இதற்கும் செய்வோம் என்கின்ற வகையிலான பதிலும், நாளை நீட் தேர்வில் இருந்து தமிழகத்திற்கு விலக்கு கிடைத்தால் நிச்சயம் இதற்கும் அதைப்போன்றதொரு நிலை இருக்கும் இதுமாதிரியான பதில்களை சட்ட வல்லுநர்கள் மூலம் எழுதி அனுப்பி இருக்கிறோம்.

கடந்த செப்டம்பர் மாதம் 17ம் தேதி ஆளுநருக்கு பதில் அனுப்பப்பட்டுவிட்டது. அவர்களுக்கான சந்தேகங்கள் முழுமையாக தீர்ந்து இருக்கும் என்று கருதுகிறோம். எனவே, போன செப்டம்பர் 17-ம் தேதி அனுப்பி அதற்கு பிறகு இப்போது 6 மாதங்களை கடந்து இருக்கிறது. இன்னமும் கூட அதற்கு ஒப்புதல் தரப்படாத நிலை என்பது இருந்து கொண்டிருக்கிறது.

முதல்வர் எடுத்த நடவடிக்கை

தமிழகத்தைப் பொறுத்தவரை சித்த மருத்துவத்திற்கு ஆதரவான மனநிலையில் மக்கள் ஏராளமான பேர் இருக்கிறார்கள். சித்த மருத்துவப் பல்கலைக் கழகம் இந்தியாவிலேயே முதன்முறையாக ஒன்று தமிழகத்தில் அமைப்பதற்கு முதல்வர் எடுத்த நடவடிக்கைகளுக்கு ஏகோபித்த ஆதரவை மக்கள் தந்து கொண்டிருக்கிறார்கள்.

தமிழக மக்கள் மனநிலை

இந்த நிலையில் இந்த மசோதாவை நீண்ட நாட்களாக கிடப்பில் வைத்திருப்பது என்பது சித்த மருத்துவத்திற்கு எதிரான ஒரு செயலாகும். தமிழக மக்கள் மனநிலைக்கு எதிரான செயலாகவும் இது பார்க்கப்படுகிறது. எனவே, விரைந்து அதற்கு அனுமதி கிடைக்கும் என்று எதிர்பார்க்கிறோம்” என்று அமைச்சர் மா.சுப்பிரமணியன் தெரிவித்தார்.

அண்மை செய்திகளை உடனுக்குடன் காண https://puthiyaparimaanam.com/ சேனலை பாருங்கள்.