காமராசர் பல்கலைக்கழகத்தில் தொடரும் பாலியல் புகார் ; மாணவர்கள் அச்சம்

காமராசர் பல்கலைக்கழகத்தில் தொடரும் பாலியல் புகார் ; மாணவர்கள் அச்சம்

kamarajar university sexual harassment continues: students on fear

• திருவனந்தபுரம் உள்ளிட்ட கேரள பகுதிகளில் இருந்தும் ஆராய்ச்சி படிப்புக்கென இப்பல்கலைக்கு மாணவர்கள் வருகின்றனர்

• கடந்த ஆண்டு தொடங்கிய இளநிலை வகுப்புகளை கையாளுவதில் ஒரு சில ஆசிரியர்கள், பல்கலைக்கழகமா, கல்லூரியா என ஈகோ பார்க்கின்றனர்.

மதுரை, ஏப். 19

அடுத்தடுத்து பேராசிரியர்கள் கைது சம்பவத்தால் மாணவர்கள் அச்சம் அடைந்துள்ள நிலையில், காமராசர் பல்கலைக்கழகத்தில் தொடரும் பாலியல் புகார் சர்ச்சைகளுக்கு முற்றுப்புள்ளி வைக்கப்படுமா என்ற எதிர்பார்ப்பு மாணவர்களிடையே ஏற்பட்டுள்ளது.

தென்மாவட்டத்தில் முக்கிய பல்கலைக்கழகமாக மதுரை காமராசர் பல்கலைக்கழகம் செயல்படுகிறது. தென்மாவட்டங்கள் மட்டுமின்றி, அருகிலுள்ள திருவனந்தபுரம் உள்ளிட்ட கேரள பகுதிகளில் இருந்தும் ஆராய்ச்சி படிப்புக்கென இப்பல்கலைக்கு மாணவர்கள் வருகின்றனர். இங்கு 20-க்கும் மேற்பட்ட புலங்களும், 77 துறைகளும் உள்ளன. கடந்த கல்வியாண்டு முதல் பல்கலைக்கழக வருவாயைப் பெருக்கும் விதமாக 6 இளங்கலை வகுப்புகளும் தொடங்கப்பட்டுள்ளன. ஆராய்ச்சி மாணவர்கள் உட்பட சுமார் 2,000 மாணவ, மாணவிகள் படிக்கின்றனர். 150-க்கும் மேற்பட்ட ஆசிரியர்களும், 670 அலுவலர், ஊழியர்களும் பணிபுரிகின்றனர்.

சமுதாய ரீதியாக சூழ்ச்சி

மிகவும் பழமையான இந்தப் பல்கலைக்கழகத்தில், சமீப காலமாக ஒரு சில துறைகளில் ஆசிரியர்கள், மாணவர்களுக்கு இடையே சரியான புரிதல் இன்றி, எதிர்மறையான மனநிலையில் செயல்படுவது போன்ற பிரச்சினைகள் எழுகின்றன. ‘ஈகோ’ காரணமாக சமுதாய ரீதியாக மாணவர்களை பிரித்தாளும் சூழ்ச்சியும் நிலவுகிறது.

விரும்பத் தகாத நிகழ்வு

தங்களுக்குப் பிடித்த மாணவ, மாணவிகளை பிடிக்காத ஆசிரியர்களுக்கு எதிராகவும், மாணவர்களுக்கு எதிராகவும் தூண்டி விடுவது, மாணவர்களுக்குள் இரு கோஷ்டியாக உருவெடுக்கச் செய்வது போன்ற விரும்பத் தகாத நிகழ்வுகளும் அரங்கேறுகின்றன என மாணவர்கள், ஆசிரியர்கள் மத்தியில் மாற்றி, மாற்றி புகார் எழுப்புகின்றனர்.

கடந்த ஆண்டு தொடங்கிய இளநிலை வகுப்புகளை கையாளுவதில் ஒரு சில ஆசிரியர்கள், பல்கலைக்கழகமா, கல்லூரியா என ஈகோ பார்க்கின்றனர். புதிதாக ஆரம்பித்த உளவியல் துறை போன்ற ஓரிரு துறையில் போதிய ஆசிரியர்கள் நியமிக்கப்படாமல், பிற துறை ஆசிரியர்களை வகுப்பெடுக்கும் சூழல் உள்ளது என இளங்களை மாணவர்கள் குற்றம்சாட்டுகின்றனர்.

பேராசிரியர் கைது

சில நாளுக்கு முன்பு மாணவிகளுக்கு எதிராக செயல்பட்டதாக பல்கலைக்கழக வரலாற்றுத் துறை பேராசிரியர் சண்முகராஜா கைது செய்யப்பட்ட நிலையில், உளவியல் துறை மாணவிகளுக்கு பாலியல் ரீதியில் தொந்தரவு அளித்ததாக காவல் நிலையத்தில் கொடுத்த புகாரின்பேரில் சமூக அறிவியல் துறை பேராசிரியர் கருப்பைா என்பவரும் நேற்று கைது செய்யப்பட்டார். இதுபோன்ற நிகழ்வுகள் அச்சத்தை ஏற்படுத்துகிறது என்று மாணவர்கள் தரப்பில் கூறுகின்றனர்.