ஆசிய விளையாட்டு போட்டி: பளுதூக்கும் பிரிவில் இந்திய வீராங்கனை மீராபாய் சானுவுக்கு வெள்ளிப் பதக்கம்
Asian Games: Indian Weightlifter Mirabai Chanu Wins Silver Medal
-
ஆசிய விளையாட்டுப் போட்டிகளில் பளுதூக்குதலில் பதக்கம் வென்ற முதல் இந்திய வீராங்கனை மீராபாய் சானு ஆவார். 28 ஆண்டுகால இடைவெளியை முடிவுக்குக் கொண்டு வந்துள்ளார் மீரா பாய் சானு
நகோயா, செப். 23
ஜப்பானின் ஐச்சி-நகோயாவில் நடைபெற்று வரும் ஆசிய விளையாட்டு போட்டிகளில் பெண்களுக்கான 49 கிலோ எடைப் பிரிவு பளுதூக்கும் போட்டியில் மீராபாய் சானு வெள்ளிப் பதக்கம் வென்றார். இதன் மூலம் மீராபாய் சானு ஆசிய விளையாட்டுப் போட்டியில் தனது முதல் பதக்கத்தைக் கைப்பற்றியுள்ளார்.
20-வது ஆசிய விளையாட்டு போட்டி ஜப்பானின் ஐச்சி-நகோயா மாகாணத்தில் நடைபெற்று வருகிறது. இதில் பெண்களுக்கான 49 கிலோ எடைப்பிரிவில், வடகொரியாவின் ரி சாங் கம்-க்கு அடுத்தபடியாக வந்த மீராபாய் சானு வெள்ளிப் பதக்கம் வென்றார். ஆசிய விளையாட்டுப் போட்டியில் பதக்கம் வெல்ல வேண்டும் என்ற மீராபாய் சானுவின் நீண்ட கால காத்திருப்புக்கு இது முற்றுப்புள்ளி வைத்துள்ளது.
டோக்கியோ ஒலிம்பிக்கில் வெள்ளிப் பதக்கம் வென்றவரான மீராபாய் சானு, இப்போட்டியில் மொத்தம் 198 கிலோ எடையை தூக்கினார். அதேவேளையில் ரி 215 கிலோ எடையை தூக்கி தங்கம் வென்றார். இந்தோனேசியாவின் லுலுக் டயானா ட்ரி விஜயனா 191 கிலோ எடையுடன் வெண்கலப் பதக்கத்தைக் கைப்பற்றினார்.
2014-ல் மீராபாய் சானு கலந்துகொண்ட முதல் ஆசிய விளையாட்டு போட்டியில் ஒன்பதாவது இடத்தைப் பிடித்தார். காயம் காரணமாக 2018 ஜகார்த்தா போட்டிகளில் கலந்துகொள்ளாத மீராபாய் சானு, 2023-ல் ஹாங்சோவில் நடந்த ஆசியப் போட்டியில் நான்காவது இடத்தைப் பிடித்தார். மூன்று ஆசிய விளையாட்டுப் போட்டிகளில் பங்கேற்று பதக்கம் வெல்லாத மீராபாய் சானு இறுதியாக ஜப்பானில் வெள்ளிப் பதக்கம் வென்றுள்ளார்.
1998-ல் பாங்காக்கில் கர்ணம் மல்லேஸ்வரி வெள்ளிப் பதக்கம் வென்ற பிறகு, ஆசிய விளையாட்டுப் போட்டிகளில் பளுதூக்குதலில் பதக்கம் வென்ற முதல் இந்திய வீராங்கனை மீராபாய் சானு ஆவார். 28 ஆண்டுகால இடைவெளியை முடிவுக்குக் கொண்டு வந்துள்ளார் மீரா பாய் சானு.
சுவாரஸ்யமான அண்மை செய்திகளை உடனுக்குடன் தெரிந்து கொள்ள https://puthiyaparimaanam.com/ மற்றும் https://youtube.com/@puthiyaparimaanamtv?si=knGTQja4kr5TtZaY சேனலை பாருங்கள்.
