தென்கொரியாவில் முதல் சர்வதேச கொரியா மற்றும் தமிழ் மொழி ஆய்வு மாநாடு: தென் கொரியா தமிழ் ஆராய்ச்சி அமைப்பு நடத்துகிறது

தென்கொரியாவில் முதல் சர்வதேச கொரியா மற்றும் தமிழ் மொழி ஆய்வு மாநாடு: தென் கொரியா தமிழ் ஆராய்ச்சி அமைப்பு நடத்துகிறது

First International Conference on Korea and Tamil Studies in South Korea: Organized by the South Korea Tamil Research Association

• இந்தியா, தென் கொரியா, இலங்கை, மலேசியா, இங்கிலாந்து உள்ளிட்ட சர்வதேச நாடுகளில் இருந்து கொரியா மற்றும் தமிழ் மொழி ஆய்வாளர்கள் ஆய்வு கட்டுரைகளை தமிழ், ஆங்கிலம், கொரியன் மொழிகளில் சமர்ப்பிக்கிறனர்.

• ஆய்வில் பங்கேற்கும் ஆய்வாளர்கள், பேராசிரியர்கள், மாணவர்கள், கொரியா–தமிழ் ஆய்வில் ஆர்வமுள்ள அனைவரும் sktraatkorea@gmail.com மின்னஞ்சலில் தொடர்பு கொள்ளலாம்

சியோல், அக். 01
தென் கொரியா தமிழ் ஆராய்ச்சி அமைப்பு (South Korea Tamil Research Association – SKTRA) நடத்தும் “முதலாவது சர்வதேச கொரியா மற்றும் தமிழ் மொழி ஆய்வு மாநாடு” (ICKTS 2026 – First International Conference on Korea–Tamil Studies), வருகிற (அக்டோபர்) 24 தேதி சியோலில் நேரடியாகவும், இணைய வழியாகவும் இரு முறைகளில் நடைபெறுகிறது.

கடந்த ஆண்டு நவம்பர் 8 தேதி நடைபெற்ற முதலாவது சர்வதேச திருக்குறள் மாநாடு (ITCSK 2025) பல நாடுகளைச் சேர்ந்த ஆய்வாளர்களை ஒருங்கிணைத்தது. அதன் தொடர்ச்சியாக, நடப்பாண்டில் கொரியா மற்றும் தமிழ் மொழி தொடர்புகள் பற்றிய ஆய்வுகளுக்கு நிலையான ஓர் உலகளாவிய ஆய்வுத் தளத்தை உருவாக்கவும், மொழி, வரலாறு, பண்பாடு, சமயம், இலக்கியம், தொல்லியல், கடல்சார் தொடர்புகள் ஆகிய துறைகளில், வரலாற்று ஆவணங்களையும், சான்றுகளையும் அடிப்படையாகக் கொண்ட ஆய்வுகளை மாநாடு முன்னெடுக்கிறது.

“தமிழ் மொழிக்கும், கொரிய மொழிக்கும் இடையிலான தொடர்புகள் பற்றிப் பல கருத்துகள் நிலவுகின்றன. அவற்றைச் சான்றுகளின் அடிப்படையில் ஆராய்ந்து, அடுத்த தலைமுறை ஆய்வாளர்களுக்கு நம்பகமான ஆதாரங்களை உருவாக்குவதே எங்கள் இலக்கு” என்று மாநாட்டின் ஒருங்கிணைப்புச் செயலாளர் கவிஞர் பீற்றர் சகாய டர்சியூஸ் தெரிவித்தார்.

இந்த மாநாட்டில் மொழியியல் மற்றும் இலக்கண ஒப்பீடு, உறவுமுறைச் சொற்கள், மரியாதைச் சொற்கள்; ஒப்பீட்டு இலக்கிய ஆய்வுகள், கடல்சார் வர்த்தகம்; தென்னிந்தியா–கொரியா பயண வழித்தடங்கள், வரலாற்று ஆவணங்கள், பயணக் குறிப்புகள், கொரியா–தமிழ் பௌத்தத் தொடர்புகள்; ஆன்மிக, தத்துவ மரபுகள், உணவு, வேளாண்மை, பாரம்பரிய விளையாட்டுகள், நாட்டுப்புறக் கலைகள், சமூக மரபுகள் பற்றிய ஒப்பீடு உள்ளிட்ட பல்வேறு தலைப்புகளில் ஆய்வுக்கட்டுரைகள் சமர்ப்பிக்கப்பட்டு, ஆய்வுக்குட்படுத்தப்பட உள்ளன.

இந்தியா, தென் கொரியா, இலங்கை, மலேசியா, இங்கிலாந்து உள்ளிட்ட சர்வதேச நாடுகளில் இருந்து கொரியா மற்றும் தமிழ் மொழி ஆய்வாளர்கள் ஆய்வு கட்டுரைகளை தமிழ், ஆங்கிலம், கொரியன் மொழிகளில் சமர்ப்பிக்க உள்ளனர். ஆய்வுக் கட்டுரை சமர்ப்பிக்க அக். 15 தேதி கடைசி நாளாகும்.

ஏற்றுக்கொள்ளப்படும் கட்டுரைகள் ISBN எண்ணுடன் கூடிய மாநாட்டு ஆய்வுத் தொகுப்பில் (Conference Proceedings) வெளியிடப்படும். தேர்ந்தெடுக்கப்படும் சிறந்த கட்டுரைகள் சர்வதேச ஆய்விதழின் மதிப்பாய்வு நடைமுறைகளுக்கு உட்பட்டு வெளியீட்டுக்குப் பரிசீலிக்கப்படும்.

சர்வதேச கொரியா மற்றும் தமிழ் மொழி ஆய்வு மாநாட்டு ஏற்பாடுகளை தென்கொரியா தமிழ் ஆராய்ச்சி அமைப்பு தலைவர் பேராசிரியர் எஸ். ஆரோக்கியராஜ், துணைத் தலைவர் கவிஞர் பீற்றர் சகாய டர்சியூஸ், செயலாளர் பேராசிரியர் ஞானராஜ் ஆகியோர் செய்து வருகின்றனர்.

ஆய்வில் பங்கேற்கும் ஆய்வாளர்கள், பேராசிரியர்கள், மாணவர்கள், கொரியா–தமிழ் ஆய்வில் ஆர்வமுள்ள அனைவரும் sktraatkorea@gmail.com மின்னஞ்சலில் தொடர்பு கொள்ளலாம் என தெரிவிக்கப்பட்டுள்ளது.

சுவாரஸ்யமான அண்மை செய்திகளை உடனுக்குடன் தெரிந்து கொள்ள  https://puthiyaparimaanam.com/  மற்றும் https://youtube.com/@puthiyaparimaanamtv?si=knGTQja4kr5TtZaY சேனலை பாருங்கள்.