சிஜேபியின் நிறுவனர் அபிஜித் தீப்கே உள்ளிட்ட முக்கிய நிர்வாகிகள் டெல்லி விமான நிலையத்தில் கைது

சிஜேபியின் நிறுவனர் அபிஜித் தீப்கே உள்ளிட்ட முக்கிய நிர்வாகிகள் டெல்லி விமான நிலையத்தில் கைது

CJP Founder Abhijit Deepke and Key Office-Bearers Arrested at Delhi Airport

• உங்களைக் கைது செய்ய மேலிடத்தில் இருந்து எங்களுக்கு உத்தரவு வந்துள்ளது என்று மட்டும் அவர்கள் கூறினார்கள். நாங்கள் ஒரு வகையில் சட்டவிரோதமாக தடுத்து வைக்கப்பட்டுள்ளோம்

• சர்வாதிகார அணுகுமுறை என்றும் அவசரநிலைக் காலத்தை நினைவூட்டுகிறது என்றும் சிஜேபி கடும் கண்டனம் தெரிவித்துள்ளது

புதுடெல்லி, அக். 10

தலைமைத் தேர்தல் ஆணையர் ஞானேஷ் குமாரை பதவி விலக வலியுறுத்தி டெல்லி ஜந்தர் மந்தரில் இன்று போராட்டம் நடத்த இருந்த நிலையில், சிஜேபியின் நிறுவனர் அபிஜித் தீப்கே உள்ளிட்ட முக்கிய நிர்வாகிகள் டெல்லி விமான நிலையத்தில் கைது செய்யப்பட்டுள்ளனர். போராட்டத்துக்கு தடை விதித்துள்ள டெல்லி போலீஸ், தடையை மீறி போராட முயல்பவர்களை பல்வேறு இடங்களில் வைத்து கைது செய்து வருகிறது.

சிஜேபி நிறுவனத் தலைவர் அபிஜித் தீப்கே, இணை ஒருங்கிணைப்பாளர்கள் சவுரவ் தாஸ், ஆசுதோஷ் ரங்கா உள்ளிட்ட முக்கிய நிர்வாகிகள் மும்பையில் இருந்து விமானம் மூலம் இன்று காலை டெல்லி வந்தடைந்தனர். விமானம் டெல்லி இந்திரா காந்தி விமான நிலையத்தை வந்தடைந்ததும், விமானத்துக்குள் சென்ற டெல்லி போலீஸார் அவர்களை விமானத்துக்குள் வைத்தே கைது செய்தனர்.
விமான நிலையத்தில் இருந்து போலீஸார் அவர்களை தடுப்பு முகாமுக்கு கொண்டு சென்றனர். எனினும், அவர்கள் எங்கு கொண்டு செல்லப்பட்டனர் என்பது குறித்த தகவல் இல்லை.
இதேபோல், சிஜேபியின் சட்டக் குழு தலைவர் ரத்னா சிங்கும் கைது செய்யப்பட்டுள்ளார். ஜந்தர் மந்தரை நோக்கி சக வழக்கறிஞர்கள் மூவருடன் அவர் காரில் சென்றுகொண்டிருந்தபோது காரை வழிமறித்த போலீஸார், அவர்கள் நால்வரையும் கைது செய்துள்ளனர்.

தாங்கள் கைது செய்யப்பட்டது குறித்து வீடியோ வெளியிட்டுள்ள ரத்னா சிங், “என்னை கைது செய்ய காவலர்கள் இன்று காலை எனது வீட்டுக்கு வந்தனர். நான் வீட்டில் இல்லை என்பது அவர்களுக்குத் தெரிவிக்கப்பட்டது. இந்நிலையில், சாலையில் சென்று கொண்டிருந்த எங்களை எந்தக் காரணமும் கூறாமல் கைது செய்துள்ளனர்.

எங்களை கைது செய்ய அதிகாரப்பூர்வ அறிவிப்பு ஏதும் உள்ளதா என்று நாங்கள் கேட்டதற்கு, உங்களைக் கைது செய்ய மேலிடத்தில் இருந்து எங்களுக்கு உத்தரவு வந்துள்ளது என்று மட்டும் அவர்கள் கூறினார்கள். நாங்கள் ஒரு வகையில் சட்டவிரோதமாக தடுத்து வைக்கப்பட்டுள்ளோம்.” என தெரிவித்துள்ளார்.

சிஜேபியின் போராட்ட அறிவிப்பை அடுத்து டெல்லியில் பாதுகாப்பு பலப்படுத்தப்பட்டுள்ளது. டெல்லி காவல் துறையைச் சேர்ந்த 15,000 போலீ​ஸாரும், மத்​திய பாது​காப்​புப் படைகளை சேர்ந்த 23,000 வீரர்​களும் குவிக்​கப்​பட்டு உள்​ளனர். ஒட்டுமொத்தமாக 38,000 வீரர்​கள் டெல்​லி​யில் பாது​காப்​புப் பணியில் ஈடு​பட்டு உள்​ளனர்.

போராட்டக்காரர்கள் ஜந்தர் மந்தரை நோக்கிச் செல்கிறார்களா என்பதை அவர்கள் உண்ணிப்பாக கண்காணித்து வருகின்றனர். இதற்காக முக்கிய சாலைகளில் தடுப்புகள் அமைக்கப்பட்டு வாகனங்கள் சோதனை செய்யப்படுகின்றன. போராட்டக்காரர்கள் பயணிப்பது தெரிய வந்தால் அவர்களை போலீஸார் உடனடியாக கைது செய்து தடுப்பு முகாம்களுக்குக் கொண்டு செல்கின்றனர்.
இதனிடையே, சிஜேபியின் முக்கிய நிர்வாகிகள் கைது செய்யப்பட்டுள்ளதற்கு தனது எக்ஸ் பக்கத்தில் அந்த அமைப்பு கடும் கண்டனம் தெரிவித்துள்ளது. இது சர்வாதிகார அணுகுமுறை என்றும் அவசரநிலைக் காலத்தை நினைவூட்டுகிறது என்றும் சிஜேபி விமர்சித்துள்ளது.

சுவாரஸ்யமான அண்மை செய்திகளை உடனுக்குடன் தெரிந்து கொள்ள  https://puthiyaparimaanam.com/  மற்றும் https://youtube.com/@puthiyaparimaanamtv?si=knGTQja4kr5TtZaY சேனலை பாருங்கள்.