சேலத்தில் 600 கிலோ வெள்ளிப் பொருட்கள் கொள்ளை; போலீசார் விசாரணை
600 kg of silver looted in Salem; police investigating
-
சேலத்தில் தயாரிக்கப்படும் வெள்ளிப் பொருட்கள் தமிழகத்தின் பல்வேறு மாவட்டங்களுக்கு மட்டுமல்லாமல் , வெளிமாநிலங்களுக்கும் விற்பனை
-
குடோனில் வெள்ளிப் பொருட்கள் அதிகளவில் இருப்பதை முன்கூட்டியே தெரிந்துகொண்டு கொள்ளையர்கள் வந்தார்களா, ஏற்கனவே அந்தப் பகுதியை நோட்டமிட்டார்களா என்ற கோணத்திலும் விசாரணை
சேலம், அக். 12
சேலத்தில் வெள்ளிக் கொலுசு தயாரிக்கும் தொழில் என்பது மிகவும் பிரபலம். இதை நோட்டமிட்டே 600 கிலோ வெள்ளிப் பொருட்கள் ஒரே இரவில் கொள்ளையடிக்கப்பட்டிருப்பதுதான் இப்போது பெரும் அதிர்ச்சியை ஏற்படுத்தியுள்ளது. ரூ.14 கோடி மதிப்புள்ள வெள்ளிப் பொருட்களைக் குறிவைத்து, காரில் வந்த 4 பேர் கொண்ட கும்பல் இந்தக் கொள்ளையில் ஈடுபட்டுள்ளது. செக்யூரிட்டியை தாக்கிக் கட்டிப்போட்டதுடன், சிசிடிவி கேமராக்களையும் ஸ்பிரே அடித்து மறைத்துவிட்டுத் தப்பியிருக்கிறது இந்தக் கும்பல்.
சேலம் மாவட்டம் என்றாலே வெள்ளிக் கொலுசுகள்தான் பலருக்கும் நினைவுக்கு வரும். இங்கு தயாரிக்கப்படும் வெள்ளிப் பொருட்கள் தமிழகத்தின் பல்வேறு மாவட்டங்களுக்கு மட்டுமல்லாமல் , வெளிமாநிலங்களுக்கும் விற்பனைக்காக அனுப்பி வைக்கப்படுகின்றன. அந்த அளவுக்கு இங்கு வெள்ளித் தொழில் பிரபலமாக உள்ளது.
இந்த தொழிலில் கடந்த 40 வருடங்களாக ஈடுபட்டு வருபவர் பாலசுப்பிரமணியம். சேலம் சினிமா நகர் பகுதியில் இவருக்குச் சொந்தமான வெள்ளிப் பொருட்கள் குடோன் உள்ளது. வெள்ளிக் கட்டிகளை வாங்கி, அவற்றைக் கொலுசு, மெட்டி, அரைஞாண் கொடி, காப்பு உள்ளிட்ட பல்வேறு பொருட்களாகத் தயாரித்து மொத்த விற்பனை செய்து வருகிறார். சில இடங்களுக்கு வெள்ளிக் கட்டிகளை அனுப்பி, அங்கு கொலுசுகளைத் தயாரித்து வாங்கும் வகையிலும் இவரது தொழில் நடைபெற்று வருகிறது. இப்படி தயாராகும் வெள்ளிப் பொருட்களை விற்பனைக்காக குடோனில் இருப்பு வைப்பது வழக்கம்.
நேற்று இரவு வழக்கம்போல் குடோனைப் பூட்டிவிட்டு, நைட் டியூட்டி பணிக்காக வெங்கடேஷ் என்பவரை அங்கு விட்டுச் சென்றுள்ளனர். ஆனால், நள்ளிரவில் காரில் வந்த 4 பேர் கொண்ட கும்பல் அங்கு புகுந்துள்ளது. முகத்தை மறைத்தபடி வந்த அவர்கள், செக்யூரிட்டி வெங்கடேஷைத் தாக்கியதுடன், அவரைக் கட்டிப்போட்டுள்ளனர்.
இதன்பிறகு குடோனுக்குள் புகுந்த அந்தக் கும்பல், அங்கிருந்த வெள்ளிப் பொருட்களை அள்ளிச் சென்றுள்ளது. அதுமட்டுமல்லாமல், அங்கிருந்த சிசிடிவி கேமராக்கள் மீது ஸ்பிரே அடித்து மறைத்துவிட்டுத் தப்பியதாகவும் தகவல் வெளியாகியுள்ளது.
காலையில் இந்தக் கொள்ளைச் சம்பவம் குறித்த தகவல் வெளியானதும், வெள்ளித் தொழிலில் ஈடுபட்டுள்ள வியாபாரிகள் மத்தியில் பெரும் அதிர்ச்சி ஏற்பட்டது. மொத்தம் 600 கிலோ வெள்ளிப் பொருட்கள் கொள்ளையடிக்கப்பட்டுள்ளன. இவற்றின் மதிப்பு சுமார் ரூ.14 கோடி எனக் கூறப்படுகிறது.
இந்தச் சம்பவம் குறித்து தகவல் கிடைத்ததும், சேலம் மாநகர காவல் ஆணையாளர் ஏ.ஜி. பாபு தலைமையிலான போலீசார் சம்பவ இடத்துக்கு விரைந்து சென்றனர். மோப்ப நாய்கள் வரவழைக்கப்பட்டதுடன், தடயவியல் நிபுணர்களும் ஆய்வு செய்து தடயங்களைச் சேகரித்தனர். குடோனில் பொருத்தப்பட்டிருந்த சிசிடிவி கேமரா காட்சிகளையும் கைப்பற்றி போலீசார் ஆய்வு செய்து வருகின்றனர். ரூ.14 கோடி காலி இதில் முக்கியமாக, மக்கள் நெருக்கம் அதிகம் உள்ள சினிமா நகர் பகுதியில் இப்படியொரு பெரிய கொள்ளை நடந்துள்ளது போலீசாரின் கவனத்தை அதிர வைத்துள்ளது.
குடோனில் வெள்ளிப் பொருட்கள் அதிகளவில் இருப்பதை முன்கூட்டியே தெரிந்துகொண்டு கொள்ளையர்கள் வந்தார்களா, ஏற்கனவே அந்தப் பகுதியை நோட்டமிட்டார்களா என்ற கோணத்திலும் விசாரணை நடக்கிறது. மேலும், இந்தக் கொள்ளையில் வடமாநிலத்தைச் சேர்ந்தவர்கள் ஈடுபட்டிருக்கலாமா என்றும் போலீசார் விசாரித்து கொண்டிருக்கிறார்கள்.. கொள்ளையர்களைப் பிடிப்பதற்காகத் தனிப்படை அமைக்கப்பட்டுத் தேடுதல் வேட்டை தீவிரப்படுத்தப்பட்டுள்ளது.
சுவாரஸ்யமான அண்மை செய்திகளை உடனுக்குடன் தெரிந்து கொள்ள https://puthiyaparimaanam.com/ மற்றும் https://youtube.com/@puthiyaparimaanamtv?si=knGTQja4kr5TtZaY சேனலை பாருங்கள்.
